Një raport i ri i Qendrës Europiane për Parandalimin dhe Kontrollin e Sëmundjeve ka ngritur alarmin se infeksionet seksualisht të transmetueshme në Europë po arrijnë shifra rekord.
Sipas raportit të publikuar nga Qendra Europiane për Parandalimin dhe Kontrollin e Sëmundjeve, rastet me gonorre dhe sifiliz janë rritur ndjeshëm gjatë dekadës së fundit, duke shqetësuar ekspertët e shëndetit publik.
Vetëm në vitin 2024, në Europë u regjistruan mbi 106 mijë raste me gonorre, një rritje prej 303% krahasuar me vitin 2015. Ndërkohë, rastet me sifiliz janë dyfishuar, duke arritur në mbi 45 mijë raste. Klamidia mbetet infeksioni seksualisht i transmetueshëm më i përhapur, me mbi 213 mijë raste të raportuara.
Ekspertët paralajmërojnë se shumë prej këtyre infeksioneve kalojnë pa simptoma, veçanërisht tek gratë, duke rritur rrezikun për komplikacione serioze si infertiliteti, dhimbjet kronike, si dhe probleme neurologjike apo kardiake në rastin e sifilizit.
Shqetësues mbetet edhe rritja e rasteve të sifilizit kongjenital, i cili transmetohet nga nëna tek foshnja gjatë shtatzënisë. Sipas raportit, numri i rasteve është pothuajse dyfishuar krahasuar me një vit më parë, duke arritur nivelin më të lartë që nga viti 2009.
Autoritetet shëndetësore europiane bëjnë thirrje për më shumë testime, ndërgjegjësim dhe masa parandaluese për të frenuar përhapjen e infeksioneve seksualisht të transmetueshme në kontinent.
